Cun especial protagonismo da natureza, nos catorce lenzos que forman a exposición, a flora e a espesura tropical da xungla móstranse en contraposición á paisaxe árida do deserto.

Paisaxes idílicos e contrapostos concibidos desde a máis húmida e intensa vexetación tropical infestada de froitos e plantas ata a beleza salvaxe e natural do deserto cos seus cactos; espazo onde a man do home actúa e transforma alicatando o chan de azulexo industrial e transformando así a paisaxe.

En “Xardíns, Cactos e Flores” a artista mostra a súa capacidade de composición e dominio da cor, traballa con decisión e limpeza recreando xardíns, espazos áridos e selváticos, sempre cun cromatismo excelente e controlado, predominando as cores verdes, azuis, vermellos e violetas e cunha textura matérica moi coidada.