A Quintana Martelo, a primeira idea xórdelle xeralmente, a través dun impacto visual, pode dicirse que o obxecto, a luz e o seu valor como contido, son as súas primeiras liñas de traballo. Empeza por un desenvolvemento puramente xeométrico, onde busca liñas espaciais que invadan e dominen o campo de traballo. Pensa sempre no valor do plano, enténdeo como a superficie bidimensional de traballo. O obxecto, vai ter o seu asentamento, con base na forma e a luz, dentro do plano, un xogo de fondo e superficie.
Quintana Martelo debuxa moito, e estuda diferentes camiños que pode levar unha obra, a cal está en decisión ata o momento final, É moi fácil que o proceso pase por diferentes estados e traballos paralelos, debuxos, acuarela, colaxe…; un modo de comprender e adoptar unha decisión que resolva as súas dúbidas.
Nas obras de Quintana Martelo, adoita haber un enfrontamento, entre o obxecto e o plano, entre a abstracción e a figuración, camiños distintos que conjuntan nun resultado último.
A súa relación coa luz, vén desde neno, xa nos seus primeiros debuxos, a luz entraba pola dereita. Esta luz vai caracterizar a obra de Quintana Martelo durante a súa traxectoria como artista, ten un compoñente cenital, de dereita a esquerda. Utilizando esa luz, atópase cómodo, entende mellor o volume, debuxa con maior soltura o obxecto en cuestión, unha postura definida.
